នាព្រឹកថ្ងៃពុធ ១៣កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែកក្កដា ឆ្នាំ២០១៨ ឯកឧត្តម ជាវ តាយ សមាជិកគណ:កម្មាធិការកណ្តាលគណបក្សប្រជាជនកម្ពុជា និងជាប្រធានគណ:កម្មាធិការគណបក្សប្រជាជនកម្ពុជាខេត្តកំពត និងមានការចូលរួមពីឯកឧត្តម អឹុង ម៉េងហួរ សមាជិកគណ:កម្មាធិការកណ្តាល គណបក្សប្រជាជនកម្ពុជា និងជាអនុប្រធានគណ:កម្មាធិការគណបក្សប្រជាជនកម្ពុជាខេត្តកំពត ឯកឧត្តម លោកជំទាវ សមាជិកគណៈកម្មាធិការកណ្តាល សមាជិកអចិន្ត្រៃយ៍នៃគណៈកម្មាធិការគណបក្សខេត្ត បេក្ខជនពេញសិទ្ធ និងបម្រុងអ្នកតំណាងរាស្ត្រមណ្ឌលកំពតរបស់គណបក្សប្រជាជនកម្ពុជា សម្រាប់នីតិកាលទី៦ រួមនឹងថ្នាក់ដឹកនាំគណបក្សក្នុងមូលដ្ឋានខេត្តកំពត ជាច្រើនរូបទៀត និងសមាជិកាគណបក្សប្រជាជនកម្ពុជាស្រុកទឹកឈូប្រមាណជាង ២.៥០០នាក់ បានអញ្ជើញចូលរួមក្នុងយុទ្ធនាការឃោសនា ផ្សព្វផ្សាយគោលនយោបាយគណបក្សប្រជាជនកម្ពុជាសម្រាប់ការបោះឆ្នោតជ្រេីសតាំងអ្នកតំណាងរាស្ត្រសម្រាប់នីតិកាលទី៦។
ឯកឧត្តម ជាវ តាយ បានអំពាវនាវដល់សមាជិក សមាជិកាគណបក្ស និងមហាជន ទាំងអស់សូមកុំជឿលើការភូតភររបស់ក្រុមអគតិមួយចំនួនតូច ដែលធ្វើការញុះញង់ប្រជាពលរដ្ឋកុំឱ្យទៅបោះឆ្នោត ក្នុងគោលបំណងបំផ្លាញការបោះឆ្នោត បំផ្លាញលទ្ធិប្រជាធិបតេយ្យ បំផ្លាញការរួបរួមសាមគ្គីភាព ឯកភាពជាតិ សន្តិភាព ស្ថេរភាព និងការអភិវឌ្ឍ នៅក្នុងប្រទេសកម្ពុជា។ ឯកឧត្តមបន្តថា ទម្រាំមានសន្តិភាពពេញលេញ និងអភិវឌ្ឍន៍ប្រទេសដល់ចំនុចនេះ រាជរដ្ឋាភិបាលដឹកនាំដោយគណបក្សប្រជាជនកម្ពុជាបានខិតខំប្រឹងប្រែងយ៉ាងខ្លាំង ជម្នះគ្រប់ឧបសគ្គ ដូច្នេះយើងទាំងអស់គ្នាត្រូវរួបរួមគ្នាថែរក្សា ការពារសមិទ្ធផលដែលគណបក្ស បានកសាងឡើងមកនេះឲ្យបានស្ថិតស្ថេរគង់វង្សទោះបីស្ថិតក្នុងតម្លៃណាក៍ដោយ។
ឯកឧត្តម ជាវ តាយ បានផ្តាំផ្ញើឲ្យសមាជិកបក្សត្រូវចូលរួមបំពេញកាតព្វកិច្ច របស់ខ្លួនដោយរៀបចំឯកសារដែល គ.ជ.ប បានកំណត់សម្រាប់យកទៅបោះឆ្នោត ហើយអញ្ជើញបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ឲ្យបានគ្រប់គ្នាៗ គឺបោះឆ្នោតជូនគណបក្សប្រជាជនកម្ពុជាមានលេខរៀងទី២០ បន្តគាំទ្របេក្ខភាពសម្តេចតេជោ ហ៊ុន សែន ជានាយករដ្ឋមន្ត្រី ដើម្បីបន្តថែរក្សាសន្តិភាព ស្ថេរភាពនយោបាយ និងបន្តអភិវឌ្ឍន៍ប្រទេសឲ្យកាន់តែទទួលបានសមិទ្ធផលថ្មីថែមទៀតសម្រាប់ជាកេរដំណែលដល់កូនចៅជំនាន់ក្រោយ៕
អត្ថបទៈ លោក ជាង ស៊ីន
