នាព្រឹកថ្ងៃចន្ទ ១១កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៣ ខែកក្កដា ឆ្នាំ២០១៨ នៅទីស្នាក់ការគណបក្សស្រុកជ៉ំគិរី ឯកឧត្តម ជាវ តាយ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជា ខេត្តកំពត និងមានការចូលរួមពី ឯកឧត្តម លោកជំទាវ សមាជិកគណៈកម្មាធិការកណ្តាល សមាជិកអចិន្ត្រៃយ៍នៃគណៈកម្មាធិការគណបក្សខេត្ត បេក្ខជនពេញសិទ្ធ និងបម្រុងអ្នកតំណាងរាស្ត្រមណ្ឌលកំពតរបស់គណបក្សប្រជាជនកម្ពុជា សម្រាប់នីតិកាលទី៦ រួមនឹងថ្នាក់ដឹកនាំគណបក្សក្នុងមូលដ្ឋានខេត្តកំពត ជាច្រើនរូបទៀត បានអញ្ជើញជួបសំណេះសំណាលជាមួយសមាជិក សមាជិកាគណបក្សប្រជាជនកម្ពុជាស្រុកជុំគិរីប្រមាណជាង ២.៥០០នាក់។
ឯកឧត្តម ជាវ តាយ បានមានប្រសាសន៍កោតសរសើចំពោះបងប្អនប្រជាពលរដ្ឋចំពោះការគោរពស្រឡាញ់ជឿជាក់ និងគាំទ្រគណបក្សប្រជាជនកម្ពុជា ព្រោះថាគណបក្សប្រជាជនកម្ពុជា កើតចេញពីប្រជាជន ការពារប្រជាជន ដើម្បីប្រជាជន ជារបស់ប្រជាជន ដែល ទន្ទឹមនឹងមានថ្ងៃនេះគណបក្សប្រជាជនបានរំដោះប្រទេសកម្ពុជាចេញពីរបបប្រល័យពូជសាសន៍ ដែបានសម្លាប់រង្គាលពូជសាសន៍ឯងស្ទើរសូន្យ។ ជាងបីទស្សវត្ស៍ចុងក្រោយនេះ សមិទ្ធិផលគ្រប់យ៉ាងដែលកើតមានឡើងដោយសារ បងប្អូនប្រជាពលរដ្ឋបានជ្រើសរើសអ្នកដឹកនាំប្រទេសពិតប្រាកដគឺសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីដែលបានតស៊ូលំបាក អត់ឃ្លាន លះបង់គ្រប់យ៉ាងដើម្បីបុព្វហេតុជាតិយើងមានសុខសន្តិភាព ឯករាជ្យជាតិពេញបរិបូណ៌ សេដ្ឋកិច្ចជាតិនៅ៥ឆ្នាំចុងក្រោយនេះមានកំណើនរហូត៧% យើងមិនធ្លាប់មានកន្លងមក ដែលបានជម្រុញដល់វិស័យនានាទូទាំងប្រទេស មានការរីកចម្រើនជាលំដាប់។ ក្នុងតថភាពជាក់ស្តែងនេះ ឯកឧត្តមប្រធានគណបក្សខេត្ត បានបញ្ជាក់ផងដែរថា ការបោះឆ្នោតនាពេលខាងមុខនេះបងប្អូនប្រជាពលរដ្ឋគឺជាម្ចាស់ប្រទេស ជាអ្នកកំណត់លើជោគវាសនាប្រទេសខ្លួន បើសម្រចចិត្តជ្រើសរើសអ្នកដឹកនាំត្រូវ នោះប្រទេសមានការអភិវឌ្ឍ បើសម្រេចចិត្តខុសប្រទេសខ្លួន នឹងធ្លាក់ក្នុងភ្លើងសង្គ្រាម និងបង្កវិនាសកម្មជាមិនខាន។
ឯកឧត្តម ជាវ តាយ បានរំលឹកដល់បងប្អូនប្រជាពលរដ្ឋគ្រប់រូបឲ្យប្រើសិទ្ធិរបស់ខ្លួនក្នុងការជ្រើសរើសអ្នកដឹកនាំប្រទេស តាមការចូលរួមបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ព្រមទាំងបោះឆ្នោតជូនគណបក្សប្រជាជនកម្ពុជាដែលមានលេខរៀងទី២០ មានរូបសញ្ញាទេវតាបាចផ្កាជាសម្គាល់ ដើម្បីបានសម្តេចតេជោ ហ៊ុន សែន បន្តដឹកនាំប្រទេសកម្ពុជាបន្តទៀត ។ “សមាជិកគណបក្សម្នាក់ បោះឆ្នោតជូនគណបក្សប្រជាជនកម្ពុជា ១សម្លេង “៕
អត្ថបទៈ លោក ជាង ស៊ីន
