កាលពីព្រឹកថ្ងៃទី០៥ ខែមេសា ឆ្នាំ២០១៧ គណបក្សប្រជាជនកម្ពុជា ខេត្តកំពតបានប្រារព្ធពិធីបញ្ចូលគរុសិស្សជំនាន់ទី៣៤ និងទី៣៥ ចំនួន១៦៣ នាក់ជាសមាជិកគណបក្សប្រជាជនកម្ពុជា។ ពិធីនេះប្រព្រឹត្តឡើងក្រោមអធិបតីភាព ឯកឧត្តមបណ្ឌិត ប៉ែន ស៊ីម៉ន ទីប្រក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជាអនុប្រធានទី១ក្រុមការងារថ្នាក់កណ្តាលចុះជួយខេត្តកំពត, ឯកឧត្តម ណាត ប៊ុនរឿន សមាជិកក្រុមការងារគណៈកម្មាធិការកណ្តាល គណបក្សប្រជាជនកម្ពុជា ចុះជួយស្រុកអង្គរជ័យ ឯកឧត្តម ចាន់ ចេស្តា ប្រធានគណៈកម្មាធិការគណបក្សប្រជាជនកម្ពុជាខេត្តកំពត និងមានការចូលរួមពីសំណាក់ឯកឧត្តម លោកជំទាវ អស់លោក លោកស្រី សមាជិកអចិន្ត្រៃយ៍គណៈកម្មាធិការគណបក្សប្រជាជនកម្ពុជាខេត្តជាភ្ញៀវកិត្តិយស។
បន្ទាប់ពីស្តាប់របាយការណ៍សង្ខេប អានដោយឯកឧត្តមប្រធានគណៈកម្មាធិការគណបក្សប្រជាជនកម្ពុជាខេត្តកំពតរួចមក ឯកឧត្តមបណ្ឌិត ប៉ែន ស៊ីម៉ន បាននាំយកប្រសាសន៍ថ្លែងអំណរគុណពីថ្នាក់ដឹកនាំកំពូលៗរបស់គណបក្សប្រជាជនកម្ពុជាជូនដល់សមាជិកថ្មីដែលទើបត្រូវបានបញ្ចូលនាពេលនេះ។ ឯកឧត្តមបណ្ឌិតបានបញ្ជាក់ថាមានតែគណបក្សប្រជាជនកម្ពុជាប៉ុណ្ណោះដែលធ្វើអ្វីៗដើម្បីប្រជាជន ពោលគឺខុសពីគណបក្សដទៃដែលតែងដើរសន្យាខ្យល់ក្នុងបំណងកេងយកចំណេញផ្នែកនយោបាយនោះ៕
