នៅព្រឹកថ្ងៃទី២៨ ខែមិថុនា ឆ្នាំ២០១៧ គណៈកម្មាធិការគណបក្សប្រជាជនកម្ពុជា ខេត្តកំពតបានរៀបចំពិធីមិទ្ទិងអបអរសាទរខួបអនុស្សាវរីយ៍លើកទី៦៦ ថ្ងៃបង្កើតគណបក្សប្រជាជនកម្ពុជា។ ពិធីនេះប្រព្រឹត្តឡើងនៅវេទិកាលើទីលាននៃរមណីយដ្ឋានស្រះឈូក ក្រោមអធិបតីភាពឯកឧត្តមចាន់ ចេស្តា ប្រធានគណៈកម្មាធិការគណបក្សប្រជាជនកម្ពុជាខេត្តកំពត ដែលមានការចូលរួមពីសមាជិកសមាជិកាប្រមាណ ៤.០០០នាក់។
ក្នុងអង្គមិទ្ទីងនេះ ឯកឧត្តមអធិបតីបានលើកយកមកអាននូវសុន្ទរកថារបស់សម្តេចអគ្គមហាសេនាបតីតេជោហ៊ុន សែន ប្រធានគណៈកម្មាធិការគណបក្ស ប្រជាជនកម្ពុជាក្នុងពិធីអបអរសាទរខួបអនុស្សាវរីយ៍លើកទី៦៦ ថ្ងៃកំណើតគណបក្ស ប្រជាជនកម្ពុជា ២៨ មិថុនា ១៩៥១-២៨ មិថុនា ២០១៧ ជូនសមាជិសមាជិកានៃអង្គពិធីទាំងមូលដើម្បីបានជ្រាបពីខ្លឹមសារទាំងស្រុង៕
