នៅព្រឹកថ្ងៃទី៩ ខែមករាឆ្នាំ២០១៧ គណៈកម្មាធិការ គណបក្សប្រជាជនក្នុងមូលដ្ឋាន សង្កាត់ត្រើយកោះ ក្រុងកំពតខេត្តកំពត បានធ្វើសន្និបាតបូកសរុបលទ្ធផលការងារដឹកនាំរយៈពេល៥ឆ្នាំ របស់គណបក្សក្នុងអណត្តិទី៣ក្រុមប្រឹក្សា ឃុំ-សង្កាត់ឆ្នាំ២០១២-២០១៧ និងកំណត់ទិសដៅផែនការអនុវត្តសម្រាប់ការងារដឹកនាំបន្តអណត្តិទី៤ គឺឆ្នាំ២០១៧-២០២២។
អង្គសន្និបាតបានប្រព្រឹត្តទៅ ដោយមានវត្តមានចូលរួមជាកិត្តិយស ពីសំណាក់ឯកឧត្ដម និងអស់លោក ជាថ្នាក់ដឹកនាំនិងជាសមាជិក ក្រុមការងារថ្នាក់កណ្ដាលថ្នាក់ខេត្ត នៃគណបក្សប្រជាជនចុះជួយក្រុងកំពត និងមានសមាជិក សមាជិកាគណបក្សប្រជាជនថ្នាក់ មូលដ្ឋានសរុបចំនួន ២៨៧នាក់។
ក្នុងអង្គសន្និបាតក៏បានឲ្យដឹងអំពីសមិទ្ធផលរីកចម្រើន ក្នុងមូលដ្ឋានទាំងការងារ សន្តិសុខសណ្ដាប់ធ្នាប់ ការងារភិវឌ្ឍន៍ ហេដ្ឋា រចនាសម្ព័ន្ធ និងការងារបំរើសេវាសាធារណៈជូនប្រជាពលរដ្ឋ ដែលគណបក្សសង្កាត់សម្រេចបានរយៈពេល៥ឆ្នាំកន្លងមកគួរឲ្យមោទនៈ។ អង្គសន្និបាតបានដំណើរការអស់រយៈពេលមួយព្រឹក ដោយបានអនុម័តលើរបាយការណ៍ និងបានធ្វើនូវសេចក្ដីសម្រេចចិត្តដាក់ចេញនូវផែនការរួម ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ឆ្នាំ២០១៧ ព្រមទាំងបានរៀបចំនីតិវិធី នៃការបោះឆ្នោតស្ទាបស្ទង់ជ្រើសរើសបេក្ខជនក្រុមប្រឹក្សាសង្កាត់ អាណត្តិទី៤ សម្រាប់ការងារដឹកនាំ២០១៧ -២០២២ បន្តទៀតដោយមានបេក្ខភាពឈរឈ្មោះចំនួន១២រូប ក្នុងនោះបោះឆ្នោតជ្រើសរើដយកបេក្ខជនពេញសិទ្ធចំនួន៥រូប។
ឯកឧត្ដមបណ្ឌិត សូត យា សមាជិកអចិន្ត្រៃយ៍ គណៈកម្មាធិការគណបក្សប្រជាជនខេត្ត និងជាអនុប្រធានក្រុមការងារថ្នាក់ខេត្តចុះជួយក្រុងកំពត បានវាយតម្លៃខ្ពស់លទ្ធផលការងារ និងបានកោតសរសើរចំពោះគណបក្សប្រជាជនសង្កាត់ត្រើយកោះ ដែលបានអនុវត្តន៍ការងាររបស់គណបក្ស ពិសេសជុំវិញការងារអភិវ្ឍន៍ភូមិ សង្កាត់ និងបម្រើ់សេវាសាធារណៈ ក្នុងរយៈពេល៥ឆ្នាំកន្លងមកជូនប្រជាពលរដ្ឋបានល្អប្រសើរ។
ឯកឧត្ដម សូត យា ក៏បានចាត់ទុកអង្គសន្និបាតនាពេលនេះ គឺពិតជាបានឆ្លុះបញ្ចាំងឲ្យឃើញអំពីការខិតខំប្រឹងប្រែងរបស់អាជ្ញាធរ និងពិសេសគណបក្សក្នុងមូលដ្ឋានសង្កាត់ បានអនុវត្តកន្លងមក និងកំពុងបន្តអនុវត្តន៍យ៉ាងសកម្ម នូវកម្មវិធីគោលនយោបាយរបស់គណបក្ស និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល ហើយក៏ពិតជាបានបង្ហាញពីការអនុវត្តនូវលទ្ធិប្រជាធិបតេយ្យយ៉ាងពិតប្រាកដ ចេញពីឆន្ទៈប្រជាពលរដ្ឋ ក្នុងការជ្រើសរើសអ្នកដឹកនាំនៅមូលដ្ឋានរបស់ខ្លួនផងដែរ។
ឯកឧត្ដម សូត យា ក៏បានផ្ដាំផ្ញើដល់សមាជិកអង្គសន្និបាត ឲ្យបន្តខិតខំយកចិត្តទុកដាក់ថែរក្សាការពារសន្តិសុខ សណ្ដាប់ធ្នាប់ក្នុងមូលដ្ឋាន និងជំរុញសកម្មភាពបម្រើសេវាសាធារណៈជូនប្រជាពលរដ្ឋ ឲ្យបានកាន់តែល្អថែមទៀត សំដៅធ្វើឲ្យលទ្ធផកការងារបោះឆ្នោតក្រុមប្រឹក្សាឃុំ-សង្កាត់អណត្តិទី៤ ឆ្នាំ២០១៧ខាងមុខនេះ ទទួលបានជ័យជំនះ ដូចអាណត្តិមុនៗទៀតផងដែរ៕
