នាឱកាសពិធីបុណ្យកាន់បិណ្ឌឆ្នាំនេះក៏ដូចឆ្នាំកន្លងទៅ ប្រជាពុទ្ធបរិស័ទនៅទូទាំងប្រទេសតែងតែនាំគ្នាទៅចូល
រួមកាន់បិណ្ឌនៅតាមទីអារាមនានាដោយបាននាំយកនូវចង្ហាន់គ្រឿងឧបភោគបរិភោគ ទេយ្យវត្ថុ និងបច្ច័យ
ដើម្បីវេរប្រគេនដល់ព្រះសង្ឃសំដៅឧទ្ទិសមហាកុសលផលបុណ្យ បញ្ជូនទៅដល់បុព្វការីជនមានមាតាបិតា ញាតិកាទាំង៧សន្ដាន ដែលបានបាក់បែកចែកឋានទៅកាន់លោកខាងមុខ និងសូមឲ្យអ្នកទាំងនោះបានទៅចាប់បដិសន្ធិនៅសុគតិភពកុំបីឃ្លៀងឃ្លាតឡើយ។
ដោយឡែកនៅព្រឹកថ្ងៃទី៨រោជខែភទ្របទឆ្នាំវក អដ្ឋស័ក ព.ស២៥៦០ ត្រូវថ្ងៃទី២៤ខែកញ្ញាឆ្នាំ២០១៦ ឯកឧត្ដម នៃ ប៉េណា អនុប្រធានទី១ព្រឹទ្ធសភា និងក្រុមគ្រួសារ ព្រមទាំង ឯកឧត្ដម លោកជំទាវ លោក លោកស្រី សមាជិក រដ្ឋសភា ព្រឹទ្ធសភា រាជរដ្ឋាភិបាល ក្រុុមប្រឹក្សា និងគណៈអភិបាលខេត្ត រួមនិងមន្ត្រីរាជការក្នុងខេត្ត ប្រជាពុទ្ធបរិស័ទជិតឆ្ងាយ បានចូលរួមកាន់បិណ្ឌវេនទី៧ នៅវត្តស្នំ៧ ឃុំម៉ាក់ប្រាង្គ ស្រុកទឹកឈូខេត្តកំពត។ ពិធីកាន់បិណ្ឌបានប្រព្រឹត្តទៅ តាមប្រពៃណីព្រះពុទ្ធសាសនាដ៏រុងរឿងនៃយើង ដោយឯកឧត្ដម នៃ ប៉េណា រួមនិងសហរីបាននាំយកនូវចង្ហាន់ គ្រឿងឧបភោគបរិភោគ ទេយ្យវត្ថុ និងបច្ច័យវេរប្រគេនព្រះសង្ឃព្រមទាំង រាប់បាតបួងសួងឧទ្ទិសមហាកុសលផលបុណ្យជូនចំពោះបុព្វការីជន មានមាតាបិតា ញាតិកាទាំង៧សន្ដាន ដែលបានបាក់បែកចែកឋានទៅកាន់លោកខាងមុខនិងសូមឲ្យអ្នកទាំងនោះបានរំដោះនូវកម្មពារវេរៀទាំងឡាយ ឲ្យចាកផុតចេញពីភពខ្ពើមទាំងពួង និងទៅចាប់បដិសន្ធិនៅសុគតិភពកុំបីឃ្លៀងឃ្លាតឡើយ។
មានប្រសាសន៍សំណេះសំណាល ក្នុងឱកាសនោះ ឯកឧត្ដម នៃ ប៉េណា បានលើកបញ្ជាក់ថាការជួបជុំធ្វើបុណ្យដូចពេលនេះ ក៏ដូចប្រជាពលរដ្ឋទូទាំងប្រទេសដែលកំពុងបានធ្វើដូចគ្នាផងដែរនោះគឺផ្ដើមចេញពីប្រទេសជាតិយើងកំពុងមានសុខសន្តិភាពដូចសព្វថ្ងៃ ក្រោមការដឹកនាំដោយនយោបាយឈ្នះៗរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ហើយឯកឧត្ដមក៏បានថ្លែងអំណរគុណ កោតសរសើរចំពោះ សហការី ប្រជាពុទ្ធបរិស័ទទាំងអស់ដែលបានចូលរួមកាន់បិណ្ឌនាពេលនេះដើម្បី រួមគ្នាលើកកម្ពស់វប្បធម៌ប្រពៃណី ព្រះពុទ្ធសាសនាដែលជាសាសនារបស់រដ្ឋដ៏រុងនៃយើង។ ក្នុងឱកាសនោះ ឯកឧត្ដម នៃ ប៉េណា និងសហការី ក៏បានវេរប្រគេនបច្ច័យចំនួន ១៦លានរៀលរួមនិងគ្រឿងឧបភោគបរិភោគ និងទេយ្យវត្ថុ មួយចំនួនដល់ព្រះសង្ឃនៃពិធីបុណ្យកាន់បិណ្ឌនេះផងដែរ៕
